კიტეიშვილმა, შესაძლოა, „შტურმი“ იანვარშივე დატოვოს

ავსტრიული მედიის ცნობით, გრაცის „შტურმი“ იანვარში შეიძლება ოთარ კიტეიშვილმა დატოვოს.

ქართველმა ფეხბურთელებმა გრაცელებთან ახალი კონტრაქტი გასულ ზაფხულს გააფორმა, მაგრამ ნათელია, რომ თუ საინტერესო შეთავაზება ექნება, კლუბი მას ხელს არ შეუშლის. 

როგორც ცნობილი გახდა, კიტეიშვილი ერთ-ერთი მთავარი კანდიდატია, რომ იანვარში „შტურმი“ დატოვოს, რადგან გერმანიის და სხვა ქვეყნის კლუბები დაინტერესებული არიან ქართველი ნახევარმცველით.

თუმცა, ჯერჯერობით, „შტურმს“ მაგიდაზე კონკრეტული შეთავაზება არ აქვს. სხვათა შორის, ერთ-ერთი კლუბი, რომელსაც კიტეს უკავშირებენ, „ჰოფენჰაიმია“, რომლის მთავარ მწვრთნელად ნოემბერში კრისტიან ილცერი დაინიშნა, რომელიც მანამდე „შტურმში“ მუშაობდა და ქართველს იდეალურად იცნობს.

„სატრანსფერო ფანჯრის პერიოდს ხმების გავრცელებაც ახლავს. „შტურმის“ ფეხბურთელებმა შემოდგომით კარგად გამოიყენეს საერთაშორისო არენა და თავი ჩემპიონთა ლიგაშიც წარმოაჩინეს. სხვადასხვა წყაროების ცნობით, შესაძლოა, ავსტრიის ჩემპიონისა და თასის გამარჯვებულის რიგები რამდენიმე მოთამაშემ იანვარში დატოვოს და საზღვარგარეთ გადაბარგდეს.

არ წყდება ხმები გუნდის საკვანძო მოთამაშეების მოსალოდნელ წასვლაზე. ამბობენ, რომ ნიკლას გეირჰოფერით გერმანიის პირველი და მეორე ბუნდესლიგის კლუბები ინტერესდებიან. საუბრობენ ულიამ ბიოვინგისა და მიკა ბირეტის დანიურ დუეტზეც. კარგად ინფორმირებული წყაროების ცნობით კი, ამ სიის სათავეში იკავებს ადგილს ოთარ კიტეიშვილიც. ქართველით გერმანიისა და სხვა ქვეყნის ლიგებში ინტერესდებიან, თუმცა, შტურმს კონკრეტული მოთხოვნა აქამდე (ჯერჯერობით) არ მიუღია“, - წერს Kronen Zeitung.

ოთარ კიტეიშვილი „შტურმში“ 2018 წლიდან თამაშობს და 208 მატჩში 47 გოლი გაიტანა. ის ერთხელ ავსტრიის ჩემპიონი გახდა, ხოლო ორჯერ ავსტრიის თასი მოიგო.