კირცხალია: ხელისუფლება ზრუნავს თავისი ქვეყნის სუვერენიტეტზე, დამოუკიდებლობაზე, ეკონომიკაზე, თითოეული მოქალაქის კეთილდღეობაზე

„გავეცანი სტატიას სახელმწიფო დეპარტამენტის, რაც არის ციტირებული და, პირველ რიგში, საინტერესოა, საერთოდ რა გამომცემლობაა, როდის მოხდა კითხვის დასმა, ეს წერილობით იყო, ადგილზე ჟურნალისტმა დაუსვა თუ რა იყო“, - ასე უპასუხა „ქართული ოცნების“ ფრაქციის თავმჯდომარის პირველმა მოადგილემ ირაკლი კირცხალიამ საქართველოს პირველი არხის გადაცემის, „დღის თემის“ წამყვანის შეკითხვას, რამდენად არის თავსებადი ურთიერთობების გადატვრთვასთან დაკავშირებით მმართველი გუნდის ოპტიმისტურ მოლოდინებთან სახელმწიფო დეპარტამენტის განცხადება, სადაც ერთ-ერთი მედიასაშუალების კითხვის პასუხად სახელმწიფო დეპარტამენტმა კიდევ ერთხელ გაიმეორა ის ნაბიჯები, რომლებსაც ისინი მოელიან საქართველოს ხელისუფლებისგან, რათა მან აჩვენოს სტრატეგიულ პარტნიორთან ურთიერთობის გაუმჯობესების ინტერესი, თუმცა იყო საკმაოდ მწვავე გზავნილები იმის შესახებ, რომ, მაგალითად, არ უნდა შეზღუდო მოწინააღმდეგე, არ უნდა მოახდინო მისი ცენზურა და ა.შ.

„არ ვიცი ეს globalnews.ge, არ მგონია, ცნობილი გამომცემლობა იყოს. ყოველ შემთხვევაში, მე არ გამიგია, მაგრამ ამას არ აქვს არსებითი მნიშვნელობა. მოდით, დაშვება გავაკეთოთ, რომ ვთქვათ, ეს არ არის რაღაც ინტერპრეტაცია, რომელიმე ისეთივე გამომცემლობის, როგორიც იყო „ბაინიუსი“, ახლახან რომ გამოქვეყნდა ბატონ ბიძინასთან მიმართებით პირდაპირ დაკვეთილი სტატია, სადაც წყაროში პირდაპირ მითითებული იყო „სოროსის ფონდი“ და ბატონი კაპანაძე აქედან, სტატიის ერთ-ერთი თანაავტორი, მთავარი წყარო, საბანაძე და კიდევ სხვა გვარები, რომლებიც პირდაპირ აფილირებული არიან კოლექტიურ „ნაცმოძრაობასთან“ და ამ აგენტურულ ქსელთან. ვიმედოვნებ, რომ არ არის ეს იგივე გამომცემლობა.

გადავიკითხე ეს სტატია, რომ დაიდო სააგენტოებზე და ყურადღებას გავამახვილებ იმაზე, რომ მოყვანილი იყო ფრაზა: „საქართველოს დასამტკიცებელი აქვს“. მე ვიტყოდი, რომ საქართველოს არაფერი არ აქვს დასამტკიცებელი, საქართველომ ძალიან მკაფიოდ და მყარად დაამტკიცა, თუნდაც თავისი ღირსეული პარტნიორობით არა მხოლოდ აშშ-თან, არამედ ნატოსა და ევროკავშირის წევრ ქვეყნებთან თითოეული თავისი გადადგმული ნაბიჯით“, - განაცხადა კირცხალიამ.

მისი თქმით, თუ გავაკეთებთ დაშვებას, რომ ეს მართლაც ითქვა პასუხად სახელმწიფო დეპარტამენტის სპიკერის მხრიდან, უბრალოდ, ალოგიკურია და, მინიმუმ, არ აქვთ სწორი წყარო, რადგან საქართველოში არანაირი დევნა არ მიმდინარეობს.

ჟურნალისტის შეკითხვაზე, აქვს თუ არა მმართველ გუნდს კომუნიკაცია აშშ-ის ახალ ადმინისტრაციასთან, რომ თავად ხელისუფლებამ ჩააყენოს ისინი საქმის კურსში, ირაკლი კირცხალიამ განაცხადა, რომ, პირველ რიგში, როდესაც ქვეყანაში წარმოდგენილია ამა თუ იმ ქვეყნის დიპლომატიური კორპუსი, პირველი საკომუნიკაციო ხაზი ყოველთვის არის დიპლომატიური მისია და საზოგადოება ხედავს, რომ საკმაოდ პოზიტიური შეხვედრები მიმდინარეობს ქალბატონ დანიგანთან.

ირაკლი კირცხალიამ, ასევე, განაცხადა, რომ ქართული საზოგადოება კარგად ხედავდა, თუ როგორ მიმდინარეობდა დონალდ ტრამპის წინასაარჩევნო კამპანია, რა პოლიტიკური ხედვები ჰქონდა და წინასაარჩევნო პერიოდიდანვე ჩანდა მის უკვე მოქმედ ადმინისტრაციასა და საქართველოს მმართველ პოლიტიკურ გუნდთან სრული მსოფლმხედველობითი თანხვედრა და, უბრალოდ, ასეთი განცხადების ლოგიკა არ არსებობს.

შეკითხვაზე, რა კომენტარს გააკეთებს კონგრესში დაინიცირებულ ორპარტიულ „მეგობარ აქტთან“ დაკავშირებით, სადაც არის საკმაოდ მძიმე გზავნილები და ახალი არჩევნების ჩატარებაა მოთხოვნილი, ირაკლი კირცხალიამ განაცხადა, რომ ქართული საზოგადოება ამ ლობისტურ ჯგუფებს და კონგრესმენთა თუ სენატორთა სახელ-გვარებს აქაურ ე.წ. ოპოზიციონერებზე, კოლექტიურ „ნაცმოძრაობაზე“ უკეთესად იცნობს, თუმცა ნამდვილად არ უნდა, ამ სახელ-გვარებთან დააკავშიროს ახალი ადმინისტრაცია.

„ყოველ შემთხვევაში, ჯერჯერობით არ გვაქვს ამის საფუძველი, რომ დავაკავშიროთ. ფაქტია, რომ ღია ლობიზმით არიან დაკავებული. ბოლოს ყველას გვახსოვს ის ჟივილ-ხივილი, რაც მოაწყვეს, მაგრამ ბოლომდე ვერც იზეიმეს, იმიტომ, რომ, რეალურად, ძალიან კარგად იციან ამ ე.წ ოპოზიციურ ველზე, თუ რა პროცედურა დაიწყეს ერთ-ერთ სავალდებულო კომიტეტზე ამავე ლობისტური ჯგუფების მხრიდან ამ კანონპროექტის, პირდაპირი მნიშვნელობით, გაპარებით სხვა კანონპროექტებთან ერთად. ამ ყველაფერს ძალიან დიდი დრო აქვს ჯერ კიდევ.

საშუალოდ, ექვსთვიანი პერიოდია, უნდა გაიაროს სხვადასხვა ინსტანცია. ეს არის აქტი, რომელსაც შეიძლება ყველაფერი ვუწოდოთ, მეგობრულის გარდა, ყველაფერი ანტიმეგობრული. ეს არის სრული ლობიზმით, სრული დესტრუქციით, მოღალატეობრივი ძალების მხრიდან ნაკარნახევი ცრუ ფაქტებით შედგენილი რაღაც აქტი, რომელსაც დაარქვეს „მეგობარი აქტი“ ამავე ძალების ლობისტებმა“, - განაცხადა კირცხალიამ.

შეკითხვაზე, რას აკეთებს ამ დროს ხელისუფლება, ირაკლი კირცხალიამ განაცხადა, რომ ხელისუფლება ამ დროს ზრუნავს თავის ქვეყანაზე, რომ ქვეყანა იყოს მშვიდობით და განვითარდეს მშვიდობით.

„ხელისუფლება ზრუნავს თავისი ქვეყნის სუვერენიტეტზე, დამოუკიდებლობაზე, ეკონომიკაზე, თითოეული მოქალაქის კეთილდღეობაზე და ზრუნავს ერთ ყველაზე მთავარზე, რომ აშშ ძალისხმევას არ იშურებს ომის დასამთავრებლად, მაგრამ საზოგადოება ხედავს, რამხელა წინააღმდეგობა აქვს ევროკავშირის წევრი ქვეყნების მხრიდან და როდესაც ჩვენს რეგიონში ასეთი ქარცეცხლია, ამ დაძაბულ სიტუაციაში ხელისუფლება ცდილობს, საქართველო მშვიდობიანი განვითარების გზაზე დარჩეს“, - აღნიშნა ირაკლი კირცხალიამ.