ლევან მაჭავარიანი: ოპოზიციაშიც ძალიან დიდ უკმაყოფილებას იწვევს ზურაბიშვილი, 2 კვირის წინ „თამარ მეფე 2-ს“ უწოდებდნენ და დღეს ლანძღავენ

„სამწუხაროდ, ქალბატონი ზურაბიშვილი პარალელურ რეალობაში ცხოვრობს. ისევ პრეზიდენტის ტრიბუნით იყო გამოსული, თავს ისევ მიიჩნევს საქართველოს პრეზიდენტად, უკან ფონად ჰქონდა 2 უშველებელი ბანერი „თავისუფლება მიხეილ სააკაშვილსო“ - სამარცხვინო პერფორმანსი იყო“, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა განაცხადა.

მისი თქმით, აქციაზე დემონსტრანტების რაოდენობა კიდევ უფრო შემცირდება, რადგან ხვდებიან, რომ 4-ვე რადიკალური პარტია გაერედან იმართება.

„თვითონ ოპოზიციაშიც ძალიან დიდ უკმაყოფილებას იწვევს ქალბატონი ზურაბიშვილი. 2 კვირის წინ უწოდებდნენ „თამარ მეფე 2-ს“ და დღეს ლანძღავენ. აქციაზე არიან ადამიანები, რომლებიც არიან გულწრფელი დემონსტრანტები, უბრალოდ შეცდომაში არიან შესულები და რაც დრო გადის ასეთი ადამიანებს რაოდენობა, რა თქმა უნდა, დრამატულად შემცირდა და კიდევ უფრო მეტად შემცირდება, ვინაიდან ეს დემონსტრანტები ხვდებიან, რომ 4-ვე რადიკალური პარტია რეალურად ერთ დღის წესრიგს ემსახურება და იმართებიან გარედან. მაგრამ ეს ბაბლი სექტანტები და მდიდარი „ენჯეოების“ მიმდევრები, ისინიც უკვე ლანძღავენ ქალბატონ ზურაბიშვილს და ეს ვიხილეთ 31 მარტის აქციაზე“, - აღნიშნავს მმართველი გუნდის დეპუტატი.