ლევან მაჭავარიანი - სამწუხაროდ, მივეჩვიეთ მძიმე შეფასებებს საერთაშორისო პარტნიორების მხრიდან, ჩვენ ვერ გვაპატიეს, რომ წითელ ხაზებს არ ვკვეთთ, ვრჩებით ამ პოზიციაზე და ვატარებთ ფრთხილ პოლიტიკას

„სამწუხაროდ, ჩვენ მივეჩვიეთ მძიმე შეფასებებს ჩვენი საერთაშორისო პარტნიორების მხრიდან 2022 წლის თებერვლიდან და რატომღაც, ეს ზუსტ თანხვედრაშია იმ თარიღთან, როდესაც უკრაინაში ეს ტრაგედია დაიწყო“, – ამის შესახებ „ქართული ოცნების“ დეპუტატმა, ლევან მაჭავარიანმა საქართველოს პირველი არხის გადაცემაში „დღის თემა“ განაცხადა.

„ჩვენ ვერ გვაპატიეს ის, რომ მოვითხოვეთ ინდივიდუალური მანევრის, ინდივიდუალური პოზიციონირების უფლება, იქიდან გამომდინარე, რომ ჩვენ არ ვართ ნატოს ქოლგის ქვეშ. ნატო არ გვიცავს და ვერ დაველაპარაკებოდით რუსეთს იგივე რიტორიკით და ვერ გავაკეთებდით ისეთ ქმედებებს, რისი გაკეთების უფლებას თავს მისცემდნენ ისეთი ქვეყნები, რომლებიც დაცული არიან ნატოს ქოლგის ქვეშ. ეს ჩვენ ვერ გვაპატიეს და ხშირად გვისაუბრია, პირდაპირი მოწოდებები რაც იყო დახურულ კარს მიღმა მეორე ფრონტთან დაკავშირებით და ჩვენ წითელ ხაზებს არ ვკვეთთ. ვიღაცას ამის სჯერა, ვიღაცას არა, გასაგებია, მაგრამ ყველამ რაც თავისი ყურით მოისმინა და თავისი თვალით ნახა, მინიმუმ, ამაზე დაყრდნობით შეუძლია ანალიზის გაკეთება. ბოლო რეზოლუციაში პირდაპირ ლუსტრირება იყო, როდესაც ევროპარლამენტარებმა ჩაგვიწერეს, რუსეთს სანქციები უნდა დაუწესოთ და დაანგრიოთ თქვენი ეკონომიკაო. მოწოდებები იყო, ჩვენი მთავრობის ოფიციალური თანხმობით თვითმფრინავის გაგზავნაზე, რაც პირდაპირ ესკალაციას გულისხმობდა, შეიარაღების უკრაინისთვის გადაცემაზე და ა.შ“, – განაცხადა მაჭავარიანმა.

ამ განცხადებით ლევან მაჭავარიანმა გადაცემის წამყვანის შეკითხვას უპასუხა, რა პასუხს გასცემს ისეთ მძიმე საერთაშორისო შეფასებებს, როგორიცაა დიდი ბრიტანეთის ელჩის განცხადება, სადაც ის ითხოვს, რომ პასუხისგებაში მიეცნენ პოლიტიკოსებზე თავდასხმებში მონაწილეები, აშშ-ის საელჩო კი აცხადებს, რომ „ქართული ოცნების“ მხრიდან ეს იყო ძალადობა აქციის მონაწილეებზე, პოლიტიკოსებსა და მედიის წარმომადგენლებზე.

მისი თქმით, არის ფაქტორები, რამაც გამოიწვია ის, რომ საქართველოს მთავრობასა და საერთაშორისო პარტნიორებს შორის ურთიერთობა ცოტა დაიძაბა.