ლევან მაჭავარიანი: ტრამპმა პირდაპირ განაცხადა, რომ ევროკავშირი ამერიკას უსამართლოდ ექცევა, საქართველოსთან მიმართებით უსამართლო მოქცევა ამის შემდეგ არავის უნდა გაუკვირდეს

„ტრამპს რამდენიმე დღის წინ დავოსის ეკონომიკურ ფორუმზე ჩართვა ჰქონდა და მან პირდაპირ განაცხადა, რომ ევროკავშირი ამერიკას უსამართლოდ ექცევა. შესაბამისად, ევროკავშირის უსამართლო მოქცევა საქართველოსთან მიმართებაში ამის შემდეგ არავის უნდა გაუკვირდეს“, - ამის შესახებ საპარლამენტო უმრავლესობის წევრმა ლევან მაჭავარიანმა განაცხადა.

დეპუტატის თქმით, ესტონეთის მხარეს არავინ ეკითხება ვიზალიბერალიზაციის საკითხს. ეს უნდა იყოს 27-ვე ქვეყნის კონსენსუსი.

„მინდა ჩვენს საზოგადოებას შევახსენო, რომ ბატონ ტრამპს რამდენიმე დღის წინ ჩართვა ჰქონდა (დავოსის ეკონომიკური ფორუმი რომ მიმდინარეობდა), სადაც მან პირდაპირ განაცხადა, რომ ევროკავშირი უსამართლოდ ექცევა ამერიკას. შესაბამისად, ევროკავშირის უსამართლოდ მოქცევა საქართველოსთან მიმართებაში, ამის შემდეგ რა თქმა უნდა, არავის უნდა გაუკვირდეს.

ესტონეთს არავინ ეკითხება ვიზალიბერალიზაციის საკითხს, ეს უნდა იყოს ევროკავშირის წევრი 27 ქვეყნის კონსენსუსი. ჩვრნ ვიცით, სულ მცირე, ის რამდენიმე ქვეყანა, რომელიც ამას არ დათანხმდება და ასეთი ქვეყნების რაოდენობა იზრდება. ვატყობთ, ევროკავშირში პოლიტიკური კონიუნქტურა როგორ იცვლება. მაგალითად, სლოვაკეთსა და უნგრეთს ემატება ისეთი ქვეყნები - ავსტრია, სერბეთი და.ა.შ. რომლებიც თავიანთ სუვერენიტეტზე ზრუნვას იწყებენ.

სხვათა შორის, ბატონი ილონ მასკის მოწოდებაც იყო, რომ დროა, ევროკავშირის ქვეყნებმა, მათ შორის გერმანიამ თავიანთ სუვერენიტეტზე იზრუნონ და უხეში ჩარევის უფლებას ბრიუსელს ნუ მისცემთ, ვინაიდან დღეს ყველაფერი ბრიუსელიდან იმართებაო“, - აღნიშნავს მაჭავარიანი.