მამუკა მდინარაძე: ჩვენი ქვეყანა ბოლომდე უნდა დავიბრუნოთ და გამოგონილი ბრალდებებით, ვერავინ უნდა შეძლოს, ჩვენი სამშობლო მუდმივი ჯანჯღარის რეჟიმში ამყოფოს

„USAID-ის მსოფლიო მასშტაბის სკანდალმა და არა მხოლოდ ამან, ყველა დაარწმუნა, რომ ჩვენი ქვეყანა ბოლომდე უნდა დავიბრუნოთ და არარსებული პრობლემებით, გამოგონილი ბრალდებებით, ვერავინ უნდა შეძლოს, ჩვენი სამშობლო ამყოფოს მუდმივი ჯანჯღარის რეჟიმში“, - ამის შესახებ უმრავლესობის ლიდერმა მამუკა მდინარაძემ განაცხადა.

მისი თქმით, სახელმწიფომ საკუთარი მოქალაქეები, ცრუ და ქვეყნის გარედან თავსმოხვეული ბრალდებებისგან უნდა დაიცვას.

„ბოლო დროს განვითარებულმა მოვლენებმა, მათ შორის, USAID-ის მსოფლიო მასშტაბის სკანდალმა და არა მხოლოდ ამან, ყველა დაარწმუნა, რომ ჩვენი ქვეყანა ბოლომდე უნდა დავიბრუნოთ და არარსებული  პრობლემებით, გამოგონილი ბრალდებებით, ვერავინ უნდა შეძლოს, ჩვენი სამშობლო ამყოფოს მუდმივი ჯანჯღარის რეჟიმში. ვერავინ უნდა შეძლოს, საკუთარი მავნებლური, ანტისახელმწიფოებრივ მიზნებისთვის გამოიყენოს ჩვენი ახალგაზრდები, არასრულწლოვნები და გულწრფელი ემოციები.

ჩვენ უნდა შევძლოთ, რომ „ენჯეოს“ წარმომადგენლებად თუ პოლიტიკოსებად შეფუთული აგენტურის  ანტიქართული მოქმედებების პრევენცია მოვახდინოთ. უნდა შევძლოთ, ჩვენი მოქალაქეები დავიცვათ - ცრუ და ქვეყნის გარედან თავსმოხვეული ბრალდებებისგან, პროპაგანდისგან და უზრუნველყოთ ისეთი მედიასტანდარტის დამკვიდრება, როგორიც დიდ ბრიტანეთში. საბოლოო ჯამში, უნდა შევქმნათ მოცემულობა, საქართველოს და ქართველი ხალხის შესახებ გადაწყვეტილებების მიღება, ყოველთვის თავად ქართველმა ხალხმა შეძლოს და არა ნებისმიერმა სხვამ“, - აღნიშნავს მდინარაძე.