„სააკაშვილს სურს ციხეს ადამიანების მასა მიაწყდეს, აჯანყება მოაწყოს“ - „ქართული ოცნების“ დეპუტატი

საპარლამენტო უმრავლესობის წევრი გურამ მაჭარაშვილი აცხადებს, რომ სააკაშვილს სურს ციხეს ადამიანების მასა მიაწყდეს, აჯანყება მოაწყოს, გამოიყვანონ ციხიდან და რევოლუციით რიგგარეშე არჩევნებს მიაღწიოს.

„ერთადერთი მისი შეწყალება პრეზიდენტს შეუძლია, რომელიც ამაზე უარს ამბობს“, -  აცხადებს დეპუტატი ჟურნალისტებთან საუბრისას.

„თქვენი მხრიდან კითხვა იყო, რომ დაგვესახელებინა, მიხეილ სააკაშვილმა როდის თქვა, რომ მას სურს, რევოლუცია ან აჯანყება. ამას ვეღარ მალავს და პირდაპირ ამბობს, რომ ციხიდან გამომიყვანეთ და რიგგარეშე არჩევნებს დავნიშნავო. გამომიყვანეთ ციხიდან რას ნიშნავს? მის მიმართ კანონიერი გადაწყვეტილება არსებობს და ერთადერთი მისი შეწყალება პრეზიდენტს შეუძლია, რომელიც ამაზე უარს ამბობს. ანუ, იმას გულისხმობს, რომ ციხეს ადამიანების მასა მიაწყდეს, აჯანყება და რევოლუცია მოაწყოს და ასე გამოიყვანოს ციხიდან და რევოლუციით რიგგარეშე არჩევნებს მიაღწიოს. ამით პირდაპირ საზოგადოებას მოუწოდა, არაკანონიერად შეიკრიბონ, ციხიდან არაკანონიერად დაიხსნას“, – განაცხადა გურამ მაჭარაშვილმა.

პატიმრობაში მყოფმა საქართველოს მესამე პრეზიდენტმა გუშინ სოციალური ქსელის მეშვეობით საზოგადოებას მიმართა და დაწერა: "30-ში საქართველოში საარჩევნო რევოლუცია მოხდა – ხალხმა საარჩევნო ყუთებთან ავტორიტარიზმი დაამარცხა. ახლა წინ პოსტსაარჩევნო რევოლუცია გვაქვს, რომელიც საარჩევნო რევოლუციის შედეგებს გააფორმებს!"