თეა წულუკიანი: ევროპის საბჭოში შეხვედრები მაძლევს იმის საფუძველს ვივარაუდო, რომ ოპოზიციას თავისი არგუმენტების გატანა უჭირს

„ევროპის საბჭოში შეხვედრები მაძლევს იმის საფუძველს ვივარაუდო, რომ ოპოზიციას თავისი არგუმენტების გატანა უჭირს, კულუარებში ისმის, რომ ოპოზიციას უჭირს დაარწმუნოს აქაური დეპუტატები, რომ არჩევნები გაყალბდა“, - ამის შესახებ პარლამენტის ვიცე-სპიკერმა, ევროპის საბჭოს საპარლამენტო ასამბლეაში საქართველოს საპარლამენტო დელეგაციის ხელმძღვანელმა თეა წულუკიანმა განაცხადა.

წულუკიანი, ასევე, აღნიშნავს, რომ ოპოზიციის წარმომადგენლები სტრასბურგში იმყოფებიან სტუმრის სტატუსით იმის გამო, რომ ისინი ამ დრომდე საქართველოს პარლამენტში არ შესულან.

„შეხვედრები მაძლევს იმის საფუძველს, ვივარაუდო, რომ ოპოზიციას სადღაც სადღაც უჭირს თავისი არგუმენტების გატანა. მათ უჭირთ ახსნან, რანაირად იყო ეს დემონსტრაციები მშვიდობიანი, თუკი მაგალითად, პოლიციელს აქვს მოტეხილობა, დაკარგა სმენა, დასჭირდა მკურნალობა, რატომ არ არის მტკიცებულება თუნდაც ერთი იმის შესახებ, რომ პოლიციელმა დაიწყო ძალის გამოყენება და.ა.შ. მათ ამაზე პასუხი არ აქვთ. ასევე კულუარებში ისმის, რომ ოპოზიციას უჭირს დაარწმუნოს აქაური დეპუტატები, რომ არჩევნები გაყალბდა, თუმცა ამას არ იმჩნევენ.

დისკუსია გაგრძელდება ოთხშაბათსაც, რაც დასრულდება კენჭისყრით და იქ შევიტყობთ ასრულდება თუ არა ექსტრემისტი ქართული ოპოზიციის ანტიქართული ოცნება და გაირიცხულია იქნება თუ არა ჩვენი დელეგაცია ასამბლეიდან“, - აღნიშნა თეა წულუკიანმა.

ცნობისთვის, სტრასბურგში ევროსაბჭოს საპარლამენტო ასამბლეაზე მონიტორინგის კომიტეტი დღეს საქართველოს დელეგაციის უფლებამოსილების საკითხზე იმსჯელებს. ამ თემაზე დებატები კი ხვალ გაიმართება და კენჭისყრაც ოთხშაბათს სიტყვით გამოსვლების შემდეგ შედგება.