თეა წულუკიანი: ფაქტია, რომ აშშ-ის ახალ პრეზიდენტს მსოფლიოს რეალობების უკეთესი გაგება აქვს, ვიდრე ჰქონდა მის წინამორბედს, ამიტომაც ვიმედოვნებთ, რომ საქართველოსთან ურთიერთობები გადაიტვირთება

 პარლამენტის ვიცე-სპიკერის, თეა წულუკიანის განცხადებით, შეერთებული შტატების ახალ პრეზიდენტს მსოფლიოს რეალობების უკეთესი გაგება აქვს, ვიდრე მის წინამორბედს.

წულუკიანის თქმით, სწორედ ამიტომ არსებობს იმედი, რომ საქართველოსთან ურთიერთობების გადატვირთვა მოხდება.

„ფაქტია უკვე ის, რომ აშშ-ში ახალ პრეზიდენტს აქვს უკეთესი გაგება მსოფლიოს რეალობების, ვიდრე ჰქონდა მის წინამორბედს და ამიტომაც ვიმედოვნებთ, რომ საქართველოსთან ურთიერთობების გადატვირთვა მოხდება, რის შესახებ მზაობა მაღალ დონეზე, მათ შორის საქართველოს პრემიერ-მინისტრის მიერ არაერთხელ გაცხადდა.

ეს იმედი ეფუძნება იმას, რომ ახალ პრეზიდენტს აქვს მწვავე აღქმა იმისა, რომ ომი ცუდია, როდესაც ის არაფერს ემსახურება, რომ ომი, რომელიც უკრაინაში მიმდინარეობს და ამდენი უკრაინელის სიცოცხლე შეიწირა, აუცილებლად უნდა დასრულდეს და რომ არ შეიძლება ახალი საომარი კერები იხსნებოდეს მსოფლიოს სხვადასხვა ქვეყანაში მხოლოდ იმიტომ, რომ ვიღაცას ეს ასე სურს. რა თქმა უნდა, ეს ემთხვევა ჩვენს მშვიდობის ხედვას და იმ ანტიმილიტარისტულ საქმიანობას, რასაც „ქართული ოცნება“ ბოლო 3-4 წლის განმავლობაში ყოველდღიურ რეჟიმში ეწევა“, - აცხადებს თეა წულუკიანი.