ელენე ხოშტარია: სამწუხაროდ, არ არის ჩვენთან დღეს ის რეალობა, რომ შევძლო შამპანურის მიჭახუნება ოცნების წარმომადგენლებთან

საქართველოს პრეზიდენტი, სალომე ზურაბიშვილი პოლიტიკური პარტიებისათვის საახალწლო მიღებას დღეს, 16 დეკემბერს გამართავს.

საქართველოს პრეზიდენტის ადმინისტრაციის ინფორმაციით, სალომე ზურაბიშვილი პოლიტიკური პარტიების წარმომადგენლებს ორბელიანების სასახლეში უმასპინძლებს. 

პოლიტიკური პარტია „დროა“- ს ლიდერი ელენე ხოშტარია ერთ -ერთია, ვინც საქართველოს პრეზიდენტის მიწვევა მიიღო, თუმცა როგორც ის ამბობს საახალწლო წვეულებაზე არ წავა.

„მივიღე მოწვევა პრეზიდენტისგან საახალწლო წვეულებაზე. პირველ რიგში, დიდი მადლობა პრეზიდენტს. გასაგებია ეს ჟესტი და დასაფასებელი. საახალწლო წვეულებაზე ვერ მივალ (ჯერ სახლისთვისაც ვერ მიყიდია ნაძვის ხე), ჯერ ერთი ემოციურად და ფიზიკურად ძალიან გამიჭირდება საახალწლო წვეულებისთვის შესაფერის განწყობაზე ვიყო და იქ ვითომც არაფერი ისე ვიყო“, - დაწერა პოლიტიკოსმა ფეისბუკის საკუთარ გვერდზე.

„სამწუხაროდ, არ არის ჩვენთან დღეს ის რეალობა, რომ შევძლო შამპანურის მიჭახუნება ოცნების წარმომადგენლებთან.

შეუძლებელია ეს შევძლო დაჭერების ფონზე.

დღეს თან მთელი დღე სასამართლოა და აქედან, რომ იქ წავიდე უბრალოდ არ შემიძლია. ასევე, პრაგმატულად არასწორი მგონია პოლარიზაციის დაძლევის პროცესი ამ ფორმით მივიღოთ.

ეს ჩემთვის თამაში გამოვა. და არასწორ პროცესში შესვლა, იმიტაცია „ნორმალურობის“ და არა ნორმალური სიტუაცია რეალურად.

არ მინდა ეს იყოს აღქმული, როგორც თავად პროცესზე უარის თქმა. პირიქით, ძალიან ველოდები პრეზიდენტის მოსაზრებებს პროცესის შინაარსზე და ამ თემაზე საქმიანად სალაპარაკოდ ნებისმიერ ფორმატში შეხვედრაზე მივალ.

ასევე, არ ვაპირებ თავს დავესხა იმათ, ვინც ოპოზიციიდან წავა. დარწმუნებული ვარ, საზეიმოდ არ მიდიან და სწორი ჰგონიათ ასე“, - დაწერა ელენე ხოშტარიამ ფეისბუკის საკუთარ გვერდზე.

დღის სხვა ამბები:

🔵 შსს: განსაკუთრებით დიდი ოდენობით ნარკოტიკი ამოვიღეთ – დავაკავეთ 4 ადამიანი (ვიდეო)

🔵 ე.წ „ფულის გათეთრების საქმეზე“ სახალხო დამცველი განცხადებას ავრცელებს