"დღეს მოუთმენლად ველი ბევრი ადამიანის ხმის გაგონებას რუსთავში" - მიხეილ სააკაშვილი

პატიმრობაში მყოფი საქართველოს მესამე პრეზიდენტი მიხეილ სააკაშვილი, ფეისბუკის ოფიციალურ გვერდზე მიმართვას ავრცელებს.

როგორც ექსპრეზიდენტი აღნიშნავს, იგი დღეს რუსთავში აქციაზე, მოუთმენლად ელის ბევრი ადამიანის ხმის გაგებას.

"მეგობრებო, მინდა იცოდეთ, რომ ვინაიდან ვარ პატიმრობაში და ვერ ვიღებ მონაწილეობას აქციების ოპერატიულ მართვასა და დაგეგმვაში, მთლიანად ვენდობი მრავალპარტიულ და უბრალოდ აქტიური ადამიანებისგან შედგენილ გუნდს.

ერთადერთი მსურს ემიგრანტებს მოვუწოდო აქტიურად იყვნენ ჩართულნი თბილისში დაგეგმილ დიდ ღონისძიებაში.

დღეს კი მოუთმენლად ველი ბევრი ადამიანის ხმის გაგონებას რუსთავში. ეს ერთადერთია, რაც მაცოცხლებს და ენერგიას მიხანგრძლივებს",- აღნიშნულია მიხეილ სააკაშვილის მიმართვაში.

დღეს გაერთიანებული ოპოზიცია რუსთავის ციხესთან საპროტესტო აქციას 18:00 საათზე გამართავს. როგორც "ნაციონალური მოძრაობის" თავმჯდომარე ნიკა მელიამ განაცხადა, ისინი არ დაიშლებიან მანამ, სანამ მიხეილ სააკაშვილს არ გაათავისუფლებენ პატიმრობიდან.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 36-ე დღეა შიმშილობს. სააკაშვილის ადვოკატები და პირადი ექიმები მისი ჯანმრთელობის მდგომარეობის დამძიმებაზე საუბრობენ და ყოფილი პრეზიდენტის სამოქალაქო კლინიკაში გადაყვანას ითხოვენ.

ასევე დაგაინტერესებთ:

რატი ბრეგაძე: მიხეილ სააკაშვილი სხვადასხვა სახის ფაფებს და ნატურალურ წვენებს იღებს, ამის მყარი მტკიცებულებები გაგვაჩნია

"არჩევნებზე ხმა მივცეთ ვისაც გვსურს ... არ ვეთანხმებოდეთ ერთმანეთს რიგ საკითხებში, მაგრამ ადამიანის სიცოცხლის გადასარჩენად, ადამიანურობა შევძლოთ" - ნიაზ დიასამიძე