"ერთთვიანი სამგზავრო აბონემენტის ღირებულება არა 150, არამედ 40 ლარია" - კალაძე ერთ-ერთ მედიასაშუალებას დეზინფორმაციის გავრცელებაში ადანაშაულებს

თბილისის მერის კახა კალაძის განცხადებით, სიმართლეს არ შეესაბამება ერთ-ერთი მედიასაშუალების მიერ გავრცელებული ინფორმაცია, თითქოს ერთთვიანი სამგზავრო აბონემენტის ღირებულება 150 ლარია. თბილისის მერის განცხადებით, ერთთვიანი სამგზავრო აბონემენტის ღირებულება არა 150, არამედ 40 ლარია.

კალაძის თქმით, აღნიშნული ინფორმაცია მოსახლეობის შეცდომაში შეყვანას და თბილისის მერიის დისკრედიტაციას  ემსახურება.

„გუშინ, ერთ-ერთ ტელეარხზე ჩვენ ვიხილეთ სიუჟეტი, სადაც საზოგადოების შეცდომაში შეყვანის მიზანმიმართული მცდელობაა.

კონკრეტული ტელეარხის ჟურნალისტი მიდის ადამიანებთან და ეკითხება, აქვთ თუ არა მათ საშუალება, ერთთვიან აბონემენტში გადაიხადონ 150 ლარი.

მე არ ვიცი, ეს ჟურნალისტის მხრიდან შეცდომა იყო თუ არა, რადგან თქვენ იცით, რომ 150 ლარი ღირს არა ერთთვიანი, არამედ 6-თვიანი აბონემენტი.

ვფიქრობ, ასეთი დეზინფორმაციების გავრცელება მიზანმიმართულად ხდება, რომ რაც შეიძლება მეტი ნიჰილიზმი დაითესოს საზოგადოებაში“, – განაცხადა თბილისის მერმა დედაქალაქის მთავრობის სხდომაზე.

კახა კალაძემ  გადახდის ახალ სისტემაზე კიდევ ერთხელ ისაუბრა და აღნიშნა, რომ მუნიციპალიტეტისგან მხარდაჭერის საჭიროების მქონე მოქალაქეებისთვის ძველი შეღავათიანი ტარიფი კვლავ ძალაში რჩება.

ამავე თემაზე:

🔳 "15 ათასზე მეტი ტრანსპორტის აბონემენტია გაყიდული" - კახა კალაძე

🔳 თბილისში, საზოგადოებრივ ტრანსპორტში გადახდის ერთიანი სისტემა და ახალი სამგზავრო ტარიფები ამოქმედდა