„გამოირჩეოდა შინაგანი ინტელექტითა და მორიდებულობით, შეიძლება მკაცრი იყოს და შეუპოვარი, რაც მე მომწონს“ - რას ამბობს დემნა გვასალიას დედა

ცნობილი ქართველი დიზაინერის, დემნა გვასალიას დედის ელა გვასალიას ინტერვიუს გთავაზობთ, რომელიც Harper's Bazaar-მა ჩაწერა. 

„ჩვენ დიდი ქართული ოჯახი გვაქვს. ქართული ოჯახი განსაკუთრებული სამყაროა, სადაც ხალხი ემოციური და ხმაურიანია. ჩვენ სახლში და მაგიდასთან, სადაც ვიკრიბებოდით, ყოველთვის ხმაური იყო. ამის ფონზე, დემნა გამოირჩეოდა შინაგანი ინტელექტითა და მორიდებულობით, მაგრამ, მიუხედავად ამისა, ყველა თამაშსა და აქტივობაში დემნა ყოველთვის ლიდერი იყო. დემნას შინაგანი ძალა აქვს, შეიძლება მკაცრი იყოს და შეუპოვარი, რაც მე მომწონს. მეც ასეთი ვარ, მაგრამ ის გულწრფელია. როდესაც დემნას სამოსს ხალხზე ვხედავ, ეს ჩემში, რა თქმა უნდა, სასიამოვნო განცდებს ბადებს – სიამაყისა და სიხარულის”,  – ამბობს დემნა გვასალიას დედა Harper’s Bazaar-თან ინტერვიუში.

ქართველი მოდის დიზაინერი დემნა გვასალია ბოლო წლების მანძილზე განსაკუთრებით პოპულარული გახდა არა მხოლოდ საქართველოში, არამედ მსოფლიოში. მისი არაორდინარული სტილი ბევრს მოსწონს, ბევრი იწუნებს, თუმცა ფაქტი ერთია – ახალგაზრდა, ნიჭიერი დიზაინერი სამეგრელოდან, ქმნის მსოფლიო მოდის ამინდს.ის ხელმძღვანელობდა „Maison Martin Margiela“-სა და „Louis Vuitton“-ის გუნდებს. ამჟამად არის ფრანგული მოდის სახლის, „Balenciaga“-ს შემოქმედებითი ხელმძღვანელი.