„მიდის სანახავად, არიიის...აბა რააა, იმედგაცრუების წლებიც დასრულებულია, დიდი გზის მხოლოდ დასაწყისში ვართ“ - გიგა გვენცაძე

„ევრო 2024“ -ის ქართველი კომენტატორი გიგა გვენცაძე სოციალურ ქსელში  2024 წლის ჩემპიონატის მერვედფინალში ესპანეთისა და საქართველოს ნაკრებს შორის 30 ივნისს დაგეგმილ მაჩტთან დაკავშირებით წერს.

გიგა გვენცაძე წერს, რომ იმედგაცრუების წლებიც დასრულებულია და მათ აღარაფრის ეშინიათ.

„ყველაზე დიდი მატჩი მას შემდეგ რაც ჩვენ ჩვენ ვართ და არა იმპერიის ნაწილი.

იქნებ ესპანეთთან გასაშვები უკვე გავუშვით -14 ბურთი ბოლო სამ თამაშში. მოგებულიც გვაქვს, ერთხელ ხო ამხანაგურად ვაწყენინეთ.

შანსის მთვლელები ესპანეთს ისეთ ფავორიტებად მიიჩნევენ, წესით არც უნდა გვათამაშონ და პირდაპირ უნდა გაიყვანონ მეოთხედფინალში. ჩვენ კი ჩვენი ოცნება გვაქვს. პირველი გოლი იყო პირველ თამაშში, პირველი ქულა მეორეში, მოგება მესამეში და მეოთხედფინლზე ვოცნებობთ მეოთხეში. პირველში ვერ გვაჯობეს და მოგვიგეს. მეორეში გვაჯობეს, მაგრამ ვერ მოგვიგეს და მესამეში ვაჯობეთ და მოვიგეთ კიდეც.

რა იქნება მეოთხეში?

რაც არ უნა მოხდეს, რა სცენარის წერის პროცესშიც არ უნდა იყოს განგება, მთავარი უკვე მოხდა. დამარცხებულის სინდრომს ვძლიეთ და იმედგაცრუების წლებიც დასრულებულია. ჩვენი კომპლექსები დავამარცხეთ და თავისუფლები ვართ.

თავისუფალ ხალხს კი ყველაფერი შეუძლია. ჩვენ უკვე აღარაფრის გვეშინია..

იქნებ ჩვენ ოცნებასაც ვაჯობოთ...

ნებისმიერ შემთხვევაში დიდი გზის მხოლოდ დასაწყისში ვართ. მომავლის გუნდი გვყავს - კვარა, მამარდა, ჩაკვე, ჟორჟი, ქოჩორა, ზურიკო, მექვაბიშილი, წიტაიშვილი, გოჩოლეიშვილი... ეს ბიჭები 23-24 წლისანი არიან. ყველაზე უმცროსი სიგუა და კიდევ რამდენი მათი თუ უმცროსი ასაკის ტალანტები, რომლებიც 26 კაციანმა განაცხადმა ვერ დაიტია.

მიდის სანახავად...არიიის...აბა რააა...ყველაფერი საქართველოსთვის. დიდება საქართველოს“, - წერს ქართველი კომენტატორი.