ევროკავშირმა რუსეთის წინააღმდეგ სანქციების მე-16 პაკეტი დაამტკიცა

ევროკავშირის ქვეყნების საგარეო უწყებების ხელმძღვანელებმა ბრიუსელში გამართულ შეხვედრაზე რუსეთის წინააღმდეგ სანქციების მე-16 პაკეტი დაამტკიცეს. ამის შესახებ „ეხო კავკაზა“ იუწყება.

თავდაპირველად ვრცელდებოდა ინფორმაცია, რომ უნგრეთი ახალ პაკეტს ვეტოს დაადებს, მაგრამ, მას შემდეგ, რაც სიიდან რამდენიმე სახელი ამოიღეს, ბუდაპეშტმაც მას მხარი დაუჭირა.

სანქციების მე-16 პაკეტი უკრაინის წინააღმდეგ რუსეთის სრულმასშტაბიანი აგრესიის მე-3 წლისთავთან დაკავშირებით არის მიღებული. მისი დეტალები მოგვიანებით გასაჯაროვდება.

სანქციების პროექტის მიხედვით, ის რუსეთის ალუმინის პროდუქციის შეძენაზე ეტაპობრივად უარის თქმას ითვალისწინებს. ასევე რუსეთიდან ნავთობის ექსპორტზე შეზღუდვებიც გამკაცრდება.

სანქციები რუსეთის „ჩრდილოვანი ფლოტის“ 73 გემის წინააღმდეგ დაწესდება. ეს გემები სანქციებისთვის გვერდის ავლისთვის გამოიყენება და მათი დახმარებით რუსეთი ნავთობით ვაჭრობას განაგძობს. ასევე სანქციები რუსეთის 13 ბანკს დაუწესდება, რომლებსაც SWIFT-ის სისტემიდან გათიშავენ.

სანქციები დაუწესდება რუსეთის სამთავრობო მედიასაშუალებებს, როგორებიცაა „ტასი“, Lenta.ru და რუსეთის თავდაცვის სამინისტროს ტელეკომპანია „ზვეზდა“. საერთო ჯამში სანქციები 8 რუსულ მედიასაშუალებას დაუწესდება. ამ გადაწყვეტილებას ევროკავშირი რუსეთის პროპაგანდასთან ბრძოლის აუცილებლობით ხსნის, რომელიც ევროკავშირის საინფორმაციო უსაფრთხოებას ემუქრება.

Reuters-ის ცნობით, საერთო ჯაში სანქციები 48 ფიზიკურ პირს და 35 იურიდიულ პირს დაუწესდება. მათ შორის არიან ინდოეთის, ყაზახეთის, ჩინეთის, გაერთიანებული საამიროების, თურქეთის და უზბეკეთის კომპანიები, რომლებიც რუსეთს სანქციებისთვის გვერდის ავლაში ეხმარებიან.