რუსი დეპუტატი მიხეილ ლერმონტოვის დაღუპვის გამოძიებას მოითხოვს

რუსეთის სახელმწიფო დუმის წევრი, სახალხო არტისტი ნიკოლაი ბურლიაევი ცნობილი რუსი პოეტის, მიხეილ ლერმონტოვის დაღუპვის გარემოებების გამოძიებას მოითხოვს. შესაბამისი თხოვნით მან რუსეთის საგამოძიებო კომიტეტს მიმართა. ინფორმაციას Deutche Welle ავრცელებს.

„გთხოვთ ჩაატაროთ დიდი რუსი პოეტის, მიხეილ ლერმონტოვის მკვლელობის გარემოებების გამოძიება. დაჟინებით მოვითხოვ, რომ გამოძიება იყოს თანამედროვე, მიუკერძოებელი და გამოყენებული იყოს რუსეთის საგამოძიებო კომიტეტის ხელთ არსებული უახლესი ტექნოლოგიები“, - აცხადებს ნიკოლაი ბურლიაევი.

ბურლიაევის აზრით, ლერმონტოვის და რუსი პოეტის ალექსანდრე პუშკინის დაღუპვა შეიძლება ერთმანეთთან დაკავშირებული იყოს და მასთან „იმ დროის რუსოფობები“ იყვნენ დაკავშირებულები.

რუსი დეპუტატი ამბობს, რომ ლერმონტოვის დაღუპვის შემდეგ, 1841 წელს გამოძიება კეთილსინდისიერად არ ჩატარებულა. ბურლიაევი ამბობს, რომ ლერმონტოვის სხეულში ტყვიამ უცნაური ტრაექტორიით შეაღწია - ქვევიდან ზევით 40-გრადუსიანი კუთხით.

1986 წელს ნიკოლაი ბურლიაევმა გადაიღო მხატვრული ფილმი „ლერმონტოვი“, სადაც მთავარი როლი შეასრულა. მაშინ ეს ფილმი ეკრანებზე არ აჩვენეს, რასაც რეჟისორმა და მსახიობმა „მასონების შეთქმულება“ უწოდა.