უნგრეთის პარლამენტმა კანონი მიიღო, რომელიც LGBTQ+ პრაიდს კრძალავს - Associated Press

უნგრეთის პარლამენტმა მიიღო კანონი, რომელიც LGBTQ+ პრაიდის ღონისძიებებს კრძალავს და ხელისუფლებას უფლებას აძლევს, გამოიყენოს სახის ამოცნობის პროგრამა მონაწილეთა იდენტიფიცირებისთვის. ამის შესახებ სააგენტო Associated Press წერს.

უნგრელმა კანონმდებლებმა პრაიდის ამკრძალავი კანონი 136 ხმით 27-ის წინააღმდეგ მიიღეს.

კანონი, რომელსაც უნგრეთის მმართველი პარტია „ფიდესი“ უჭერს მხარს, პარლამენტში დაჩქარებული წესით გავიდა მას შემდეგ, რაც ის მხოლოდ ერთი დღით ადრე წარადგინეს.

სააგენტოს ცნობით, დოკუმენტით შეკრებების შესახებ უნგრეთის კანონში ცვლილება შევა, კერძოდ, დანაშაულად ჩაითვლება ისეთი ღონისძიებების გამართვა, ან მათზე დასწრება, რომლებიც არღვევს უნგრეთის კანონმდებლობას „ბავშვთა დაცვის“ შესახებ, რომელიც კრძალავს ჰომოსექსუალიზმის „გამოხატვას ან პროპაგანდას“ 18 წლამდე ასაკის არასრულწლოვნებში.

კანონის თანახმად, აკრძალულ ღონისძიებაზე დასწრება 200 000 უნგრულ ფორინტამდე (546$) ჯარიმით დაისჯება, რომელიც სახელმწიფომ „ბავშვების დასაცავად“ უნდა გამოიყენოს. ამასთან, ხელისუფლებას შეუძლია, გამოიყენოს სახის ამოცნობის საშუალებები აკრძალულ ღონისძიებაზე დამსწრე პირების იდენტიფიცირებისთვის.

აღნიშნულია, რომ ბუდაპეშტში, უნგრეთის პარლამენტში კენჭისყრის დროს ოპოზიციის დეპუტატებმა შეხვედრების დარბაზში ფერადი კვამლი გაუშვეს.

ცნობისთვის,  უნგრეთის პრემიერ-მინისტრმა ვიქტორ ორბანმა 2021 წელს აკრძალა „ჰომოსექსუალიზმის პროპაგანდა“ 18 წლამდე ადამიანებში, უფლებადამცველი ჯგუფებისა და ევროკავშირის მხრიდან მკაცრი კრიტიკის მიუხედავად.