1000 ევრომდე ჯარიმა Green pass-ის გარეშე მგზავრობისთვის და პირბადე ღია სივრცეში - იტალია რეგულაციებს ისევ ამკაცრებს

მსოფლიოს სხვადასხვა ქვეყნებში დაინფიცირების ინდექსის გაზრდის ფონზე, იტალია კოვიდრეგულაციებს ისევ ამკაცრებს. და ეს, მიუხედავად იმისა, რომ იტალიაში სხვა ქვეყნებთან შედარებით, მდგომარეობა მეტ-ნაკლებად სტაბილურია. 

იტალიის მთავრობის ბოლო, 29 ნოემბრის გადაწყვეტილებით, 6 დეკემბრიდან Green pass-ი საზოგადოებრივი ტრანსპორტით სარგებლობისთვისაც სავალდებულო იქნება. ეს კი იმას ნიშნავს, რომ კონტროლის შემთხვევაში სამგზავრო ბილეთთან ერთად, "მწვანე საშვის" წარდგენაც მოგიწევთ. სწორედ 6 დეკემბრიდან ამოქმედდება ე.წ. Super Green pass-იც.

რა ხდება იმ შემთხვევაში, თუ პირს არ აქვს აღნიშნულ საშვი? ასეთ შემთხვევაში გათვალისწინებულია ფულადი ჯარიმა, 600-დან 1000 ევრომდე. 

კონტროლს საზოგადოებრივი ტრანსპორტის კომპანიის წარმომადგენლები და პოლიცია, ან კარაბინერები, ერთობლივად განახორციელებენ, მაგრამ Green pass-ის მოთხოვნის უფლება, მხოლოდ კონტროლიორსაც აქვს და მოქალაქის მხრიდან წინააღმდეგობის გაწევის შემთხვევაში, ის უფლებამოსილია, პოლიცია გამოიძახოს.

გარდა ამისა, მთელი რიგი ქალაქების ცენტრებში, პირბადე კვლავ სავალდებულო ხდება ღია სივრცეშიც.

მთავრობის განცხადებით, ეს ზომები წინასაშობაო პრევენციისთვის მიიღეს, რათა თავიდან აიცილონ ვირუსის ისევ სწრაფად გავრცელება. 

ბოლო მონაცემებით იტალიაში, 16 806 ახალი შემთხვევა და დაფიქსირდა და 72 ადამიანი გარდაიცვალა. პანდემიის დაწყებიდან დღემდე ქვეყანაში კოვიდ19-ის 5 060 430 შემთხვევაა დაფიქსირებული. 

ნინა მამუკაძე