ზელიმხან ხანგოშვილის მკვლელობაში ბრალდებულ რუსეთის მოქალაქეს უვადო პატიმრობა მიუსაჯეს

ზელიმხან ხანგოშვილის მკვლელობაში ბრალდებულ რუსეთის მოქალაქეს უვადო პატიმრობა მიუსაჯეს, - ინფორმაციას საერთაშორისო მედია ავრცელებს.

მათივე ცნობით, ბერლინის უმაღლესმა სასამართლომ ვადიმ კრასიკოვ/სოკოლოვი  დამნაშავედ ცნო ზელიმხან ხანგოშვილის მკვლელობაში. 

დეკემბრის დასაწყისში გერმანიის ფედერალურმა პროკურატურამ განაცხადა, რომ რუსეთის მოქალაქის დანაშაული დამტკიცებულია და ვადიმ კრასიკოვ/სოკოლოვისთვის სასჯელის სახით უვადო პატიმრობა მოითხოვა.

ამასთან, გენერალურმა პროკურორმა თქვა, რომ დარწმუნებულია, მკვლელობას პოლიტიკური მოტივი აქვს და ის რუსეთის სახელმწიფო უწყებების შეკვეთით იყო ორგანიზებული.

გერმანიის პროკურატურის ცნობით, ვადიმ კრასიკოვ/სოკოლოვი ბერლინში საფრანგეთისა და პოლონეთის გავლით ყალბი პასპორტით ჩავიდა.

მკვლელობას ჰყავდა თვითმხილველები, ხოლო მისი მარშრუტი დადგინდა სატელეფონო სიმბარათის საშუალებით.

ბრალდების მხარემ სასამართლოზე განაცხადა, რომ ხანგოშვილი იბრძოდა რუსეთის არმიის წინააღმდეგ ჩეჩნეთის მეორე ომის დროს, რის გამოც მოსკოვი მას მტრად მიიჩნევდა და სწორედ ამიტომ მოხდა მისი ლიკვიდაცია.

სასამართლო განხილვა ამ საქმეზე 14 თვე გაგრძელდა, დაიკითხა 50-ზე მეტი მოწმე.

ზელიმხან ხანგოშვილი რუსეთში ტერორიზმის ბრალდებით იყო ძებნილი. ხანგოშვილი გერმანიაში მას შემდეგ გადავიდა საცხოვრებლად, რაც 2015 წელს საქართველოში მას თავს დაესხნენ.

ხანგოშვილი 2019 წლის აგვისტოში ბერლინში მოკლეს.

დღის სხვა ამბები:

🔵 საპატრიარქო - ეკლესია მხარს დაუჭერს ერთსულოვნებისკენ მიმართულ ნებისმიერ ინიციატივას

🔵 მამუკა ხაზარაძე: ხვალ 3 წლიანი პოლიტიკური სასამართლო დევნის ბოლო სხდომაა!