ილონ მასკი: როგორც რამდენიმე წლის წინ ვთქვი, ბაიდენი მთავარი პირი არ ყოფილა, მთავარი იყო ის, ვინც მის სუფლიორს აკონტროლებდა

„როგორც რამდენიმე წლის წინ ვთქვი, ბაიდენი მთავარი პირი არ ყოფილა. მთავარი იყო ის, ვინც მის სუფლიორს აკონტროლებდა“, - ასე ეხმაურება ილონ მასკი კონგრესის წარმომადგენელთა პალატის სპიკერის ინტერვიუს, რომელიც „ფრი პრესმა“ გაავრცელა.

როგორც მაიკ ჯონსონი ჰყვება, ბოლო ერთი წლის განმავლობაში ჯოზეფ ბაიდენი პრაქტიკულად ვერ ხელმძღვანელობდა ქვეყანას და ხშირად ისეთ გადაწყვეტილებებს აწერდა ხელს, რომელზედაც წარმოდგენაც კი არ ჰქონდა.

„ერთ-ერთ შეხვედრაზე მე მას ვკითხე: - სერ, რატომ შეაჩერეთ თხევადი გაზის ექსპორტი ევროპაში? თქვენ ხომ გესმით, რომ ამით პუტინის სამხედრო მანქანას კვებავთ? მან მითხრა: მე ეს არ გამიკეთებია. მე კი ვუთხარი - დიახ, ბატონო პრეზიდენტო, თქვენ ეს გააკეთეთ, ეს განკარგულება სამი კვირის წინ გამოეცით, რომელიც შეგიძლიათ მდივნისგან გამოითხოვოთ და ერთად წავიკითხოთ. ამის შემდეგ მან გაიხსენა - „თქვენ ბუნებრივ აირზე ამბობთ?“ მაგრამ განკარგულებაში ხომ საუბარი იყო თხევადი გაზის მოხმარების შედეგებზე. მე ვუპასუხე - სერ, თქვენ შეაჩერეთ თხევადი გაზის მიწოდება, მე ეს ვიცი და ეს დიდ ზიანს აყენებს ჩვენს ეკონომიკას და ეროვნულ უსაფრთხოებას. ამ საუბრისას მივხვდი, რომ ის არ ტყუოდა, მან მართლა არ იცოდა რას მოაწერა ხელი. და შეხვედრიდან შეშფოთებული გამოვედი, რადგანაც მივხვდი, სერიოზული პრობლემები გვქონდა, არ ვიცოდი ვინ მართავდა ქვეყანას“, - განაცხადა მაიკ ჯონსონმა.

As I said a few years ago, Biden was not in charge. Whoever controlled his teleprompter was. https://t.co/kzwQpWlzx8

— Elon Musk (@elonmusk) January 18, 2025