მარკო რუბიო: უკრაინაში ომი, შესაძლოა, რამდენიმე კვირაში დასრულდეს

აშშ-ის სახელმწიფო მდივნის მარკო რუბიოს განცხადებით, უკრაინაში ომი, შესაძლოა, რამდენიმე კვირაში დასრულდეს.

რუბიოს თქმით, ამერიკულ მხარეს სურს გაიგოს, ომის დასასრულებლად რა კომპრომისებზე შეიძლება წავიდეს როგორც მოსკოვი, ასევე კიევი.

„პრეზიდენტ ტრამპს სურს ამ ომის დასრულება. ის მიიჩნევს, რომ ძალიან ბევრი ადამიანი დაიღუპა და რომ ამ ომს მასშტაბური ნგრევა მოჰყვა. ვფიქრობ, ყველა გახარებული უნდა იყოს, რომ ტრამპი მშვიდობის პრეზიდენტია. გვყავს ლიდერი, რომელსაც ომების დასრულება სურს და არა დაწყება, თუმცა საქმე გვაქვს ომთან და ორივე მხარე უნდა დავსვათ მოლაპარაკების მაგიდასთან. დავიწყოთ რუსეთით და ვკითხოთ, დაინტერესებული არის თუ არა კონფლიქტის დასრულებით. ევროპაში, რომ დაელაპარაკო ხალხს, იქ ამ კითხვაზე გიპასუხებენ, რომ პუტინს ომის დასრულება არ სურს.

რეალურად მოსკოვი მზად არის ომი გარკვეული პირობებით დაასრულოს, თუმცა ეს პირობები ჯერ არ განგვიხილავს. ეს მოხდება შემდგომ ეტაპზე და ცხადია, ზუსტად იგივე კითხვით მივმართავთ უკრაინასაც. ომს ვერ დავასრულებთ, თუ ორივე მხარე არ შეთანხმდება. ამას შესაძლოა დღეები ან კვირები დასჭირდეს, თუმცა ჩვენ პროცესს დავიწყებთ. რატომ გააკრიტიკებს ვინმე პრეზიდენტ ტრამპს ომის დამთავრების გამო, რომელიც დაჯდა მილიარდობით დოლარი, ასობით ათასი ადამიანის სიცოცხლე“, - აღნიშნა აშშ-ის სახელმწიფო მდივანმა.