სტამბოლის მერის, ეკრემ იმამოღლუს მხარდასაჭერ აქციაზე პოლიციასა და დემონსტრანტებს შორის შეტაკება მოხდა

თურქეთის ქალაქ სტამბოლში პოლიციასა და დემონსტრანტებს შორის შეტაკება მოხდა. ინფორმაციას ამის შესახებ „ესოშიეთიდ პრესი“ ავრცელებს.

მედიის ცნობით, აქციის მონაწილეები სასამართლოსთან ქალაქის ოპოზიციონერი მერის, ეკრემ იმამოღლუსთვის მხარდასაჭერის გამოსახატავად იყვნენ მისულები.

მდგომარეობა მას შემდეგ დაიძაბა, რაც სპეცრაზმმა დაბლოკა სპეციალური ავტობუსი, რომელიც პოლიტიკოსებს ემსახურება. ამას მოჰყვა შეტაკება მომიტინგეებსა და პოლიციას შორის, სამართალდამცველებმა აქციის მონაწილეების წინააღმდეგ ცრემლსადენი გაზი გამოიყენეს. მოგვიანებით იმამოღლუმ ხალხს სხვა ადგილიდან მიმართა.

„დღევანდელი საკითხი სამართლიანობის საკითხია, უფლებისა და სამართლიანობის ძიების საკითხია. სამწუხაროდ, დღევანდელი საკითხი მომდინარეობს შეთქმულებიდან, რომელიც მზადდება სტამბოლის წინააღმდეგ“, – განაცხადა ეკრემ იმამოღლუმ.

მედიის ცნობით, იმამოღლუ სასამართლოში ჩვენების მისაცემად დაიბარეს. სტამბოლის მერი უკვე ნასამართლევია თურქეთის უმაღლესი საარჩევნო საბჭოს წევრების შეურაცხყოფისთვის და მის ნასამართლობას ზემდგომი სასამართლო თუ დაადასტურებს, იმამოღლუს პოლიტიკური აქტივობის აკრძალვა ემუქრება.

როგორც მედია წერს, იმამოღლუს 2015 წლის ტენდერის სავარაუდო გაყალბებაში მონაწილეობასაც ედავებიან.