ტრამპი ტარიფებზე: იქნება თუ არა ტკივილი? - შესაძლოა, მაგრამ ჩვენ ვართ ქვეყანა, რომელსაც ახლა საღი აზრით მართავენ და შედეგები იქნება შთამბეჭდავი

აშშ-ის პრეზიდენტმა დონალდ ტრამპმა ამერიკელები გააფრთხილა, რომ შეერთებული შტატების სამი უმსხვილესი სავაჭრო პარტნიორის - მექსიკის, კანადისა და ჩინეთის - წინააღმდეგ დაწესებული ტარიფების გამო, მათ შესაძლოა, ეკონომიკური „ტკივილი“ განიცადონ. ამის შესახებ ტრამპმა სოციალურ ქსელ Truth Social-ში დაწერა.

აშშ-ის პრეზიდენტი ასევე დაიმუქრა უფრო ფართო სავაჭრო ომით, რომელიც მოიცავს ევროკავშირს და შესაძლოა, დიდ ბრიტანეთსაც.

„ეს იქნება ამერიკის ოქროს ხანა! იქნება თუ არა ტკივილი? დიახ, შესაძლოა (ან შესაძლოა, არა!), მაგრამ ჩვენ ამერიკას კვლავ დიდებულს გავხდით! და ეს ყველაფერი იმ ფასად ღირს, რომელიც უნდა გადავიხადოთ. ჩვენ ვართ ქვეყანა, რომელსაც ახლა საღი აზრით მართავენ — და შედეგები იქნება შთამბეჭდავი“, - დაწერა ტრამპმა.

მან ჟურნალისტებს განუცხადა, რომ 3 თებერვალს გეგმავს მოლაპარაკებებს კანადისა და მექსიკის ლიდერებთან ტარიფების შესახებ, რომელმაც, ექსპერტების აზრით, შესაძლოა, მსოფლიო ეკონომიკა შეარყიოს, თუმცა აშშ-ის პრეზიდენტმა არ მიანიშნა, რომ გადახედავს თავის ქმედებებს.

ტრამპმა ასევე თქვა, რომ ევროკავშირის საქონელზე ტარიფები „აუცილებლად იქნება“ და რომ ეს „საკმაოდ მალე“ მოხდება. მან ასევე აღნიშნა, რომ დიდი ბრიტანეთი შესაძლოა, ტარიფებს დაექვემდებაროს.

ევროკავშირმა 2 თებერვალს განაცხადა, რომ მისი პასუხი იქნება „მკაცრი“, თუ ტრამპი ტარიფებს დააწესებს, თუმცა ბრიუსელი იმედოვნებს, რომ მოლაპარაკებების გზით სავაჭრო ომს თავიდან აიცილებენ.

ცნობისთვის, კანადიდან, მექსიკიდან და ჩინეთიდან იმპორტირებულ საქონელზე ტარიფები 1-ელი თებერვლიდან ამოქმედდა. კერძოდ, აშშ-ის ახალმა ადმინისტრაციამ 25%-იანი ტარიფები დაუწესა კანადასა და მექსიკას, 10%-იანი კი ჩინეთს.

კანადა, მექსიკა და ჩინეთი აშშ-ს საპასუხო ზომებით დაემუქრნენ და მოუწოდეს სავაჭრო მოლაპარაკებებისკენ ტარიფების ნაცვლად, რამაც შეიძლება გაზარდოს ხარჯები მომხმარებლებისთვის და ზიანი მიაყენოს ყველა მონაწილე მხარის ეკონომიკას.

ტრამპი კი აცხადებს, რომ ტარიფები საჭიროა იმიგრაციისა და ნარკოტიკებით ვაჭრობის შესაჩერებლად, ასევე, შიდა ინდუსტრიის გასაძლიერებლად.