ირაკლი კირცხალია: „ქართული ოცნების“ პრინციპებისა და ღირებულებების ერთგულებამ აჩვენა ის, რომ ჩვენი ახალგაზრდები არ იღუპებიან ომში და ქვეყანაში თენდება ბომბების წვიმის გარეშე

 „ქართული ოცნების“ პრინციპებისა და ღირებულებების ერთგულებამ აჩვენა ის, რომ ჩვენ მშვიდობიან ქვეყანაში ვიღვიძებთ, გვაქვს ორნიშნა ეკონომიკური ზრდა,  ჩვენი ახალგაზრდები არ იღუპებიან ომში, ქვეყანაში თენდება ბომბების წვიმის გარეშე, რასაც ბევრი ჩვენი ოპოზიციონერი ნატრულობდა რუსთაველის გამზირზე“, - ამის შესახებ ფრაქცია „ქართული ოცნების“ თავმჯდომარის პირველმა მოადგილე ირაკლი კირცხალიამ განაცხადა.

კირცხალიამ ისაუბრა იმ შეტევასა და ზეწოლაზე, რომელიც საქართველოსთან მიმართებით ხორციელდებოდა ევროპიდან და აშშ-დან.

„კარგად გახსოვთ, როგორი ზეწოლა მოდიოდა ევროპიდან და აშშ-დან. კარგად გახსოვთ ის თითოეული ეროვნული, მშვიდობაზე ორიენტირებული გადაწყვეტილება, რაც „ქართულმა ოცნებამ“ დააანონსა ომის [რუსეთ-უკრაინის] დაწყების დღიდან. ზოგჯერ როგორ არაპოპულარულად ჟღერდა ეს გადაწყვეტილებები. იმ პერიოდში, როდესაც ასეთი მასობრივი შეტევა მიდიოდა ჩვენს ქვეყანასა და ხელისუფლებაზე, ჩვენ მაინც გავატარეთ ის პოლიტიკური ხაზი, რომელიც სამშვიდობო პოლიტიკას მიესადაგება, მოვედით დღევანდელ დღემდე და დღეს უკვე ვხედავთ როგორი რიტორიკაა და საითკენ იცვლება ყველაფერი“, - აცხადებს კირცხალია.

ფრაქცია „ქართული ოცნების“ თავმჯდომარის პირველმა მოადგილემ, ასევე, ისაუბრა იმის შესახებ, თუ რა  ქმედითი ნაბიჯები გადადგა საქართველომ უკრაინის მიმართ.

„არ არსებობდა უკრაინის მხარდამჭერი პოლიტიკური რეზოლუცია ან დოკუმენტი, რომელსაც საქართველო არ შეუერთდა. ჩვენი შესაძლებლობებიდან და მშვიდობის პოლიტიკიდან გამომდინარე აბსოლუტურად ყველაფერში გვერდში ვედექით უკრაინას და რა მივიღეთ?! ელჩის გაწვევა, ბულინგი და ზეწოლა ყველა იმ აქაური მარიონეტისგან, რომელიც „დიფ სთეითის“ მანქანის მიერ იმართებოდა. უნდა გაჩერდეს ეს ყველაფერი, რეალურად უნდა დამშვიდდეს ეს სიტუაცია. ძალიან  მალე ვუსურვებ უკრაინას მშვიდობას“, - აღნიშნავს ფრაქცია „ქართული ოცნების“ თავმჯდომარის პირველი მოადგილე.