პროტესტის მიუხედავად ბათუმისა და ზუგდიდის საკრებულომ 2022 წლის ბიუჯეტის პროექტი დაამტკიცა

ოპოზიციის პროტესტის მიუხედავად ბათუმისა და ზუგდიდის საკრებულომ პარალელურად, 2022 წლის ბიუჯეტის პროექტი დაამტკიცა.

ბათუმში მცირე ინციდენტს ჰქონდა ადგილი, ბიუროს სხდომა დაწყებიდან რამდენიმე წუთში შეწყდა.  მიზეზი გაურკვეველი ნივთიერება გახდა, რომელიც "ნაციონალური მოძრაობის" ერთ-ერთმა წევრმა ძირს დაასხა, რის შემდეგაც დარბაზში მძაფრი სუნი დადგა.  იგი პოლიციამ ადგილიდან ძალის გამოყენებით გაიყვანა. თუმცა, სხდომა მოგვიანებით განახლდა და ბიუჯეტის პროექტიც დამტკიცდა.

ბათუმის მომავალი წლის ბიუჯეტი 252 მილიონ ლარს შეადგენს.

ბათუმში ადგილზე ვითარება კვლავ დაძაბული რჩება, ოპოზიციის წარმომადგენლები საკრებულოს გარე პერიმეტრზე იმყოფებიან, სადაც რამდენიმეჯერ მოხდა შეხლა-შემოხლა. პოლიციამ სავარაუდოდ რამდენიმე პირი განარიდა ადგილიდან, მათ დაკავებაზე ამ დრომდე  ინფორმაცია არ ვრცელდება.

რაც შეეხება ზუგდიდს, 2017 წლის მოწვევის საკრებულომ მომავალი წლის ბიუჯეტი ასევე ხმაურის ფონზე მიიღო. საკრებულოს სხდომას მხოლოდ უმრავლესობის წარმომადგენლები ესწრებოდნენ. ოპოზიციას კი პოლიციამ ძალის გამოყენებით დაატოვებინა დარბაზი.

მანამდე ოპოზიცია შეეცადა სხდომა ჩაეშალა, რომელიც მათივე განმარტებით, უკანონოდ გეგმავს იმ ფინანსური დოკუმენტის მიღებას, რომელზეც პასუხისმგებლობა ახალმა საკრებულომ უნდა აიღოს.

ზუგდიდის მუნიციპალიტეტის ბიუჯეტი 47 მილიონ 200 ათასი ლარითაა განსაზღვრული.

ამავე თემაზე:

🔲 „რასაც წამალი ვერ უშველის, უშველის დანა, რასაც დანა ვერ უშველის, უშველის ცეცხლი!“ - მურმან დუმბაძე