„ყველაფერზე პასუხი უნდა აგონ, 9 წლის განმავლობაში, საკუთარ თავზე გამოვცადეთ ბიზნესის სისტემური რეკეტი, სისტემური წამება-გაუპატიურება“ - მაჭავარიანი „ნაცმოძრაობაზე“

ფრაქცია „ქართული ოცნების“ თავმჯდომარის მოადგილე ლევან მაჭავარიანი აცხადებს, რომ პარლამენტში შექმნილი საგამოძიებო კომისიის მუშაობა, რომელიც 2003-2012 წლებში, „ნაცმოძრაობის“ ხელისუფლებაში ყოფნის პერიოდს შეისწავლის, აბსოლუტურად საჯარო იქნება.

დეპუტატის თქმით, „ნაცმოძრაობის“ რეჟიმს ბევრ კითხვაზე აქვს პასუხი გასაცემი.

ამასთან, მაჭავარიანი დასძენს, რომ ყველაფერს სამართლებრივი კვალიფიკაცია უნდა მიეცეს.

„ჩვენ ვართ, პირველ რიგში, ვალდებულები იმ ასობით ათასი ოჯახის წინაშე, რომლებმაც თავის თავზე გამოცადა ის ჩაგვრა და წამება, რაც იმ რეჟიმმა შემოგვთავაზა. არსებობს უამრავი შეკითხვა, რაზეც ამ რეჟიმს პასუხი აქვს გასაცემი: რატომ აღმოჩნდით რუსეთთან ომში, რატომ შეუცვალეს კოდორს სტატუსი და დაარქვეს ზემო აფხაზეთი, რატომ მოაწერეს რეზოლუციას ხელი, სადაც ჩვენ სამხედროებს დააბრალეს ომის დანაშაულების ჩადენა და ომის დაწყება, რატომ დაეთანხმნენ ტალიავინის დასკვნას, რატომ გადაუფორმეს, ფაქტობრივად, ყველა სტრატეგიული ობიექტი, რაც საქართველოს გააჩნია, რუსეთის სახელმწიფოს მფლობელობაში არსებულ კომპანიებს?!

ის რეჟიმი, რაც 9 წლის განმავლობაში ჩვენ ვიხილეთ და ჩვენს თავზე გამოვცადეთ, ბიზნესის სისტემური რეკეტი, სისტემური წამება-გაუპატიურება, რასაც სტრასბურგის სასამართლომაც სისტემური ხასიათის დანაშაულის კვალიფიკაცია მიანიჭა, სამართლებრივი კვალიფიკაცია უნდა მიეცეს ამ ყველაფერს და ყველაფერზე პასუხი უნდა აგონ. ის 6-თვიანი მუშაობა, რომელსაც საპარლამენტო კომისია გაწევს, იქნება აბსოლუტურად საჯარო“, - აღნიშნავს მმართველი გუნდის დეპუტატი.