პარლამენტი არის ტვინი, ხოლო აღმასრულებელი ხელისუფლება გული - დეპუტატი კახაძე

„პარლამენტი არის ტვინი, ხოლო აღმასრულებელი ხელისუფლება გული, რომელიც მუდმივ მზაობაშია ეს ტვინი კვებოს და მზადაა მუდმივად იმუშაოს ჟანგბადის (იდეების) დროულად მისაწოდებლად“, – ასე გამოეხმაურა პარლამენტის ჯანდაცვის კომიტეტის თავმჯდომარის მოადგილე „საზოგადოებრივი ჯანდაცვის შესახებ“ კანონში ცვლილებებს, რომლითაც მთავრობას covid-შეზღუდვების შემოღების უფლების 2023 წლამდე გაგრძელება სურს.

ლადო კახაძე ირწმუნება, რომ ახალი რეგულაციების დაწესება არ ხდება, უბრალოდ პარლამენტი უფლებას აძლევს ხელისუფლებას, მართოს სიტუაცია მოსახლეობის საკეთილდღეოდ.

„მე მახსოვს და ალბათ ახალგაზრდებს ყველას გახსოვთ, 2019 წელი – აღმასვლა, დიდი იმედები ჩვენს ქვეყანაში; დღესაც საზომად რჩება 2019 წლის წარმატებები, წარმატებულად ჩატარებული ტურისტული სეზონი, დაძრული და ხელ-ფეხ-გახსნილი ბიზნესი, იმედიანი ხვალინდელი დღე.

ზუსტად მაშინ, 2019 წელს უხანში დაფიქსირდა ახალი ვირუსი და ჯერ არაფერი ვიცოდით რა უნდა გაეკეთებინა მაშინ. გავიდა ხანი და 3 კვირის შემდეგ თქვეს, რომ ეს ვირუსი საფრთხეს უქმნიდა დედამიწას.

2020 წლის 26 თებერვალს უკვე პირველი შემთხვევა ჩვენთანაც დაფიქსირდა – იმ დღეს გავიკეთე ნიღაბი და მას შემდეგ არ მომიხსნია. გავიარეთ ვირუსის გავრცელების 5 ტალღა.

პარლამენტი არის ტვინი, ხოლო აღმასრულებელი ხელისუფლება გული, რომელიც მუდმივ მზაობაშია ეს ტვინი კვებოს და მზადაა მუდმივად იმუშაოს ჟანგბადის (იდეების) დროულად მისაწოდებლად.

მაშინ ადამიანის უფლებები წამოვიდა წინა პლანზე, იყო მკაცრი „ლოქდაუნები“, თუმცა მაშინ არ ვიყავით მზად, არ ვიცოდით რა იქნებოდა, საქმეში ჩაერთო სამედიცინო ინტელექტუალური სექტორი, გავიარეთ გადამზადება, ჰოსპიტალური სექტორის გადამზადება და ა.შ.“, – განაცხადა ლადო კახაძემ.

ასევე საინტერესოა:

🔵 ევროკავშირის ტერიტორიაზე ციფრული კოვიდ სერტიფიკატების მოქმედების ვადად ცხრა თვე განისაზღვრა

🔵 ლარი კვლავ გაუფასურდა - ვალუტის კურსი