საქართველოს ნაკრებმა სომხეთთან მატჩებისთვის მზადება თბილისში არასრული შემადგენლობით დაიწყო

საქართველოს ეროვნულმა ნაკრებმა სომხეთთან ერთა ლიგის პლეი-ოფის მატჩებისთვის მზადება დაიწყო.

შეკრების პირველ დღეს, ჩვენმა გუნდმა მიხეილ მესხი 2-ზე 15 ფეხბურთელის შემადგენლობით ივარჯიშა. საკლუბო მატჩებიდან გამომდინარე, შეკრების პირველ საწვრთნელ პროცესში მონაწილეობა არ მიუღიათ ბუდუ ზივზივაძეს, გიორგი მიქაუტაძეს, ხვიჩა კვარაცხელიას, ნიკა კვეკვესკირს, ზურიკო დავითაშვილს, გიორგი ქოჩორაშვილს, ოთარ კიტეიშვილს, შოთა ნონიკაშვილს, გიორგი გოჩოლეიშვილს და გიორგი წიტაიშვილს. ნაკრები სრული შემადგენლობით თბილისში 18 მარტს შეიკრიბება.

საქართველოს ნაკრების შემადგენლობა

მეკარეები: გიორგი მამარდაშვილი (ვალენსია, ესპანეთი), გიორგი ლორია (ომონია, კვიპროსი), ლუკა გუგეშაშვილი (პანსერაიკოსი, საბერძნეთი)

მცველები: გურამ კაშია (სლოვანი, სლოვაკეთი), ოთარ კაკაბაძე (კრაკოვია, პოლონეთი), ლაშა დვალი (აპოელი, კვიპროსი), ლუკა ლოჩოშვილი (სალერნიტანა, იტალია), გიორგი გოჩოლეიშვილი (კოპენჰაგენი, დანია), საბა გოგლიჩიძე (ემპოლი, იტალია), ირაკლი აზაროვი (შახტარი, უკრაინა), ლუკა ლაცაბიძე (ჩერნომორეცი, უკრაინა)

ნახევარმცველები: ოთარ კიტეიშვილი (შტურმი, ავსტრია), გიორგი ქოჩორაშვილი (ლევანტე, ესპანეთი), ნიკა კვეკვესკირი (ნირეჰაზა, უნგრეთი) ანზორ მექვაბიშვილი (კრაიოვა, რუმინეთი), ლევან შენგელია (ოფი კრეტა, საბერძნეთი), გიორგი წიტაიშვილი (გრანადა, ესპანეთი), გიორგი ჩაკვეტაძე (უოტფორდი, ინგლისი), შოთა ნონიკაშვილი (ჩერკასი, უკრაინა), გიორგი ზარია (კაირათი, ყაზახეთი), ზურიკო დავითაშვილი (სენტ-ეტიენი, საფრანგეთი)

თავდამსხმელები: გიორგი გულიაშვილი (სარაევო, ბოსნია და ჰერცეგოვინა), ხვიჩა კვარაცხელია (პსჟ, საფრანგეთი), ბუდუ ზივზივაძე (ჰაიდენჰაიმი, გერმანია), გიორგი მიქაუტაძე (ლიონის ოლიმპიკი, საფრანგეთი)

მოგეხსენებათ, პირველ მატჩს, რომელიც ერევანში გაიმართება, დისკვალიფიკაციის გამო ხვიჩა კვარაცხელია და გურამ კაშია გამოტოვებენ. ეს სერიოზული დანაკლისია, თუმცა, საპასუხო მატჩში მათ თამაშის უფლება ექნებათ. ამიტომაც, სანიოლმა ისინი რა თქმა უნდა, გამოიძახა.

საქართველოსა და სომხეთის ორმატჩიანი დაპირისპირებით ირკვევა, ვინ ითამაშებს ერთა ლიგის მომდევნო სეზონში B ლიგაში და ვინ C ლიგაში. ორი მატჩის გამარჯვებული B დივიზიონში იქნება, ხოლო დამარცხებული შესაბამისად, C დივიზიონში.

საქართველოს ნაკრებმა ერთა ლიგის გასულ სეზონში ჯგუფში 7 ქულით მესამე ადგილი დაიკავა და სწორედ ამიტომ უწევს დასარჩენ პლეი-ოფში თამაში. პირველი შეხვედრა 20 მარტს, 21:00 საათზე ერევანში შედგება, ხოლო საპასუხო 23 მარტს, 18:00 საათზე თბილისში, „დინამო არენაზე“.