აშშ მალე რუმინელებს უვიზოდ მოგზაურობის საშუალებას მისცემს

შეერთებული შტატები და რუმინეთი პარასკევს, 10 იანვარს ხელს მოაწერენ შეთანხმებას უვიზო მიმოსვლის შესახებ. შეთანხმება მოქალაქეებს საშუალებას აძლევს შეერთებულ შტატებში უვიზოდ გაემგზავრონ, - როგორც  European Pravda წერს, ამის შესახებ ვაშინგტონში რუმინეთის საელჩოში განაცხადეს.

დიპლომატიური ოფისის განცხადებით, აშშ-ის შიდა უსაფრთხოების მდივანი ალეხანდრო მაიორკასი და რუმინეთის ელჩი ანდრეი მურარუ შეხვდებიან ერთმანეთს ოფიციალურად და გამოაცხადებენ ზუსტ თარიღს უვიზოდ მიმოსვლის შესახებ.

„პარასკევის ღონისძიება არის რუმინელი და ამერიკელი ოფიციალური პირების მრავალწლიანი შრომის კულმინაცია და საბოლოო შედეგი“, - ნათქვამია განცხადებაში.

როგორც მედია წერს, ამჟამად ბულგარეთი, კვიპროსი და რუმინეთი ევროკავშირის ერთადერთი ქვეყნებია, რომელთა მოქალაქეებს ჯერ კიდევ სჭირდებათ ვიზა შეერთებულ შტატებში შესასვლელად. აშშ-ის მოქალაქეებს არ სჭირდებათ ვიზა ევროკავშირის რომელიმე ქვეყნის მოსანახულებლად.

Visa Waiver პროგრამა გაძლევთ საშუალებას იმოგზაუროთ შეერთებულ შტატებში უვიზოდ 90 დღემდე ტურისტული ან საქმიანი მიზნებისთვის.

შეერთებულ შტატებში რუმინეთის საელჩოს მონაცემებით, 2024 წელს რუმინელებმა მხოლოდ 80 596 სავიზო განაცხადი წარადგინეს საქმიანი და ტურისტული მოგზაურობისთვის. ეს ორჯერ მეტია, ვიდრე 2013 წელს.

შეგახსენებთ, რომ რუმინეთი ბულგარეთთან ერთად შენგენის ზონის სრულუფლებიანი წევრი 2025 წლის 1-ელ იანვარს გახდა.