მასკი დახურულ შეხვედრაზე ბრიტანეთის პრემიერის პოსტიდან კირ სტარმერის გადაყენებას განიხილავდა - The Financial Times

კომპანია SpaceX-ის დამფუძნებელი და ტრამპის ადმინისტრაციაში აშშ-ის მთავრობის ეფექტურობის დეპარტამენტის მომავალი თანახელმძღვანელი, ილონ მასკი თანამოაზრეებთან ერთად გამართულ დახურულ შეხვედრაზე დიდი ბრიტანეთის პრემიერ-მინისტრის თანამდებობიდან კირ სტარმერის გადაყენების საკითხს განიხილავდა. ინფორმაციას The Financial Times ავრცელებს.

მასკი, რომელიც მსოფლიოს უმდიდრესი ადამიანი და აშშ-ის არჩეული პრეზიდენტის დონალდ ტრამპის მოკავშირეა, მის მემარჯვენე თანამოაზრეებთან ერთად ეძებს გზებს, თუ როგორ მოახდინოს ბრიტანეთის „ლეიბორისტული“ მთავრობის დესტაბილიზაცია სოციალურ ქსელ X-ში აგრესიული პოსტების წერის გარდა.

„ის ფიქრობს, რომ დასავლური ცივილიზაცია საფრთხეშია“, - ციტირებს გამოცემა წყაროს, რომელიც დახურული შეხვედრის დეტალებს იცნობს.

მასკის თანამოაზრეების თქმით, მას აინტერესებდა, შეიძლება თუ არა ალტერნატიული ბრიტანული პოლიტიკური მოძრაობების, ისეთების, როგორიცაა „დიდი ბრიტანეთის რეფორმების პარტია“, მხარდაჭერა, რათა შემდეგ საპარლამენტო არჩევნებამდე პრემიერის ცვლილება მოხდეს.

როგორც The Financial Times-ი აღნიშნავს, მასკი ბრიტანული პოლიტიკით უკანასკნელი ექვსი თვის მანძილზე ინტერესდება და ძალიან აკრიტიკებს სტარმერის მთავრობას.

გასულ კვირას მან ბრიტანეთში ახალი ეროვნული გამოძიების ჩატარება მოითხოვა, რომელიც პაკისტანელი და ბრიტანელი მამაკაცების მიერ გოგონების გაუპატიურებისა და სექსუალური ექსპლუატაციის ფაქტებს გამოიძიებს.

მასკის მტკიცებით, ადრე ამ საქმე სტარმერი იძიებდა, რომელიც ინგლისისა და უელსის პროკურორი იყო. ტრამპის მოკავშირე ფიქრობს, რომ ბრიტანეთის პრემიერი ამ დანაშაულის თანამონაწილეა, რადგან მან დამნაშავეებს ხელი დააფარა.