მსოფლიო უნდა დაუბრუნდეს „მაქსიმალური ზეწოლის“ პოლიტიკას ირანის წინააღმდეგ, რათა ის უფრო დემოკრატიულ ქვეყნად აქციოს - ტრამპის მომავალი წარმომადგენელი უკრაინაში

 მსოფლიო უნდა დაუბრუნდეს „მაქსიმალური ზეწოლის“ პოლიტიკას ირანის წინააღმდეგ, რათა ის უფრო დემოკრატიულ ქვეყნად აქციოს, - ამის შესახებ აშშ-ის არჩეული პრეზიდენტის დონალდ ტრამპის მომავალმა სპეციალურმა წარმომადგენელმა უკრაინასა და რუსეთში, გადამდგარმა გენერალმა კით კელოგმა პარიზში გამართულ ირანის ოპოზიციის ღონისძიებაზე განაცხადა.

„ეს ზეწოლა არ უნდა იყოს მხოლოდ კინეტიკური, მხოლოდ სამხედრო ძალა, არამედ ის ასევე უნდა იყოს ეკონომიკური და დიპლომატიური“, - განუცხადა კელოგმა პარიზში დაფუძნებული ირანული ოპოზიციური ჯგუფის, ირანის წინააღმდეგობის ეროვნული საბჭოს (NCRI) აუდიტორიას.

მისი თქმით, არსებობს იმის შესაძლებლობა, რომ „ირანი უკეთესობისკენ შეიცვალოს“, მაგრამ ეს შესაძლებლობა სამუდამოდ არ გაგრძელდება.

„ჩვენ უნდა გამოვიყენოთ ის სისუსტე, რომელსაც ახლა ვხედავთ. იმედი არსებობს, ასევე უნდა იყოს ქმედებაც“, - განაცხადა კელოგმა.

პარიზში გამართულ ღონისძიებას ირანის საგარეო საქმეთა სამინისტრო გამოეხმაურა.

„საფრანგეთის მიერ ტერორისტული ჯგუფის მასპინძლობა არის ტერორიზმის მხარდაჭერის ნათელი მაგალითი და საფრანგეთის მთავრობის საერთაშორისო სამართლებრივი ვალდებულების დარღვევა ტერორიზმთან ბრძოლის შესახებ“, - განაცხადეს ირანის საგარეო უწყებაში.