რუსეთმა ყაზახეთში სამშვიდობო ძალების შეყვანა დაიწყო

კოლექტიური უსაფრთხოების ორგანიზაცია ყაზახეთში სამშვიდობო ძალებს გაგზავნის, ამის შესახებ სომხეთის პრეზიდენტის ნიკოლ ფაშინიანი აცხადებს.

სამშვიდობო ძალების ყაზახეთში შეყვანა უკვე დაიწყო რუსეთმა.

როგორც რუსული სააგენტო „რია ნოვოსტი“ წერს, „ყაზახეთში სამშვიდობო კონტინგენტის რუსული ნაწილის გაგზავნა რუსეთის საჰაერო-კოსმოსური ძალების სამხედრო-სატრანსპორტო ავიაციით ხდება“.

„ამ დროისათვის სამშვიდობო კონტინგენტის რუსული ნაწილის გადაყვანა ყაზახეთის რესპუბლიკის ტერიტორიაზე რუსეთის საჰაერო კოსმოსური ძალების სამხედრო-სატრანსპორტო ავიაციის თვითმფრინავებით ხდება. სამხედრო ნაწილებმა უკვე დაიწყეს დაკისრებული ამოცანების შესრულება", - წერია კოლექტიური უსაფრთხოების ხელშეკრულების ორგანიზაციის განცხადებაში.

სამშვიდობო ძალების კონტინგენტში რუსეთის, სომხეთის, ბელარუსის, ტაჯიკეთისა და ყირგიზეთის სამხედროები შედიან.

ამერიკის შეერთებული შტატები ყაზახეთის მთავრობას თავშეკავებისკენ, ხალხს კი მშვიდობიანი პროტესტისკენ მოუწოდებს.

„შეერთებული შტატები ყურადღებით აკვირდება სიტუაციას ყაზახეთში, რომელიც ღირებული პარტნიორია. ჩვენ ვგმობთ ძალადობის აქტებს, საკუთრების განადგურებას და მოვუწოდებთ თავშეკავებისკენ როგორც ხელისუფლებას, ასევე მომიტინგეებს. ვთხოვთ ყველა ყაზახს, პატივი სცეს და დაიცვას კონსტიტუციური ინსტიტუტები, ადამიანის უფლებები და მედიის თავისუფლება, მათ შორის ინტერნეტსერვისის აღდგენის გზით. მოვუწოდებთ ყველა მხარეს, იპოვონ საგანგებო მდგომარეობის მშვიდობიანი გადაწყვეტა“,- ნათქვამია სახელმწიფო დეპარტამენტის განცხადებაში.

ამავე თემაზე:

🔵 ყაზახეთიდან საქართველოს მიმართულებით ავიარეისები გაუქმდა

🔵 8 დაღუპული და 317 დაშავებული - ყაზახეთის შსს

🔵 VIDEO: ყაზახეთში საგანგებო მდგომარეობა გამოცხადდა