„ჩემთვის მთავარი იყო, რომ არ გვქონოდა ვალი“ - ზელენსკიმ დაადასტურა, რომ წიაღისეულის შესახებ შეთანხმების საბოლოო ვერსია მზად არის

 უკრაინის პრეზიდენტის ვოლოდიმირ ზელენსკის განცხადებით, აშშ-სთან წიაღისეულის შეთანხმების საბოლოო ვერსიაში არსად არ არის მითითებული, რომ უკრაინას ვალი აქვს წარსულში მიღებული დახმარებისთვის. ამის შესახებ ზელენსკიმ პრესკონფერენციაზე განაცხადა.

 მისი თქმით, უკრაინელი თანამდებობის პირები ძალიან დადებითად აფასებენ მომავალი შეთანხმების საბოლოო ვერსიას.

„მართლაც, გუნდებმა ბევრი იმუშავეს - უკრაინელებმაც და ამერიკელებმაც. ჩემთვის მთავარი იყო, რომ ჩვენ არ გვაქვს ვალი, იმის მიუხედავად, მედიაში რა ვრცელდება. შეთანხმებაში არ არის არც 500 მილიარდი დოლარი, არც 350 და არც 100 მილიარდი, რადგან, ეს ჩვენთან მიმართებით უსამართლო მიდგომა იქნებოდა“, - ამბობს ზელენსკი.

შეგახსენებთ, 25 თებერვალს ინფორმაცია გავრცელდა იმის შესახებ, რომ უკრაინამ და შტატებმა შეათანხმეს იშვიათი მინერალების გარიგების დეტალები.

Financial Times-ის ცნობით, შეთანხმებას წინ უძღოდა აშშ-ის მიერ „ყველაზე მკაცრ მოთხოვნებზე“ უარის თქმა. უფრო კონკრეტულად კი, დათქმა იმის თაობაზე, რომ წიაღისეულის მოპოვებიდან მიღებულ თანხას უკრაინა გადარიცხავდა ფონდში, რომლის 100%-საც აშშ გამოიყენებდა იქამდე, სანამ შემოსავალი 500 მილიარდ დოლარს არ მიაღწევდა.