„ნახევრად დიქტატორი“ - რუმინეთის პრეზიდენტობის კანდიდატი ზელენსკიზე

 რუმინეთის პრეზიდენტობის კანდიდატმა და ულტრამემარჯვენე პოლიტიკოსმა კალინ ჯორჯესკუმ უკრაინის პრეზიდენტი ვოლოდიმირ ზელენსკი გააკრიტიკა და მას „ნახევრად დიქტატორი“ უწოდა. ამის შესახებ მან ტელეკომპანია Realitatea Plus-ის ეთერში განაცხადა.

ჯორჯესკუმ კიევის პოლიტიკოსები უკრაინა-რუსეთის „კონფლიქტის გაღვივებაში“ დაადანაშაულა, რამაც, მისი თქმით, „ევროპის ეკონომიკის დესტაბილიზაცია“ გამოიწვია.

რუმინელმა პოლიტიკოსმა აღნიშნა, რომ მას ზელენსკის „ქცევასთან დაკავშირებით პრობლემა“ აქვს და მას „ნახევრად დიქტატორი“ უწოდა.

„სრული თანაგრძნობა და პატივისცემა მაქვს უკრაინელი ხალხის მიმართ. ჩვენ გავხსენით ჩვენი საზღვრები და სახლების კარები მეზობლებისთვის. თუმცა, მე მაქვს პრობლემა კორუფციასთან და პოლიტიკოსების ცრუ დამოკიდებულებასთან, მათ შორის კიევში.

ასევე, მაქვს პრობლემა ნახევრად დიქტატორებთან, რომლებიც საკუთარ ინტერესებს და იმ ჯგუფის ინტერესებს, რომლებსაც წარმოადგენენ, ეროვნულ ინტერესებზე მაღლა აყენებენ. ასე რომ, მე ვკითხულობ: რატომ არ უშვებს ბატონი ზელენსკი, ბატონი იოჰანისის მსგავსად, თავისუფალ არჩევნებს? არ ეშინიათ? რამდენჯერ ითხოვა ბ-ნმა ზელენსკიმ დიალოგი, სანამ იარაღს ითხოვდა? - არც ერთხელ“, - განაცხადა ჯორჯესკუმ.

მან ასევე განმარტა თავისი განცხადება, რომ „უკრაინა გამოგონილი სახელმწიფოა“.

„ის, რომ უკრაინა არის სახელმწიფო, რომელიც დიდი ძალების ნებით შეიქმნა, ისტორიული ფაქტია. ეს არ უნდა ჩაითვალოს ტენდენციურ, ან ცილისმწამებლურ განცხადებად. გერმანიამაც კი ხელახლა შექმნა საკუთარი თავი 1989 წელს კედლის დანგრევით, ამიტომ, ეს განცხადება შეურაცხყოფად კი არ უნდა ჩაითვალოს, არამედ ისტორიულ სიმართლედ, რომელიც გასათვალისწინებელია. რაც არ უნდა გადაწყვიტონ დიდმა სახელმწიფოებმა, მათ მაინც აქვთ გადაწყვეტილების უფლება“, - აღნიშნა ჯორჯესკუმ.

ამასთან, რუმინელმა პოლიტიკოსმა ისაუბრა უკრაინის იმ ტერიტორიებზე, რომლებზეც რუმინეთს შესაძლოა, პრეტენზია ჰქონდეს და ამ საკითხთან დაკავშირებით უკრაინის საგარეო საქმეთა სამინისტროს რეაქციას გამოეხმაურა. კერძოდ, უკრაინის საგარეო უწყებამ ჯორჯესკუ დაადანაშაულა იმაში, რომ მას „მოსკოვში პატრონები ჰყავს“.

„რაც შეეხება უკრაინაში რუმინეთის ტერიტორიებს, მოხარული ვარ, რომ ვხედავ უკრაინის საგარეო საქმეთა სამინისტროს მძაფრ რეაქციას, რადგან ეს ნიშნავს, რომ კიევში დიპლომატებმაც იგრძნეს, როგორ ჟღერს ეს განცხადება, რაც ეროვნულ იმედგაცრუებას იწვევს.

ეს იგივეა, რასაც ათიათასობით რუმინელი გრძნობს უკრაინაში, მასწავლებლები, ოჯახები და ყველა ერთად, როდესაც ხედავენ, რომ მათაც არ აქვთ დიდი პატივისცემა რუმინელი ხალხის ენისა და ისტორიის მიმართ, ხალხის მიმართ, რომლებმაც თავიანთი ხელები და გულები გაუხსნეს უკრაინელი ლტოლვილების ტალღებს“, - განაცხადა მან.