მიხეილ სარჯველაძე: ყველაფერს გააკეთებს სასწრაფო დახმარება სწრაფად რეაგირებისთვის, დიდთოვლობის გამო ოპერატიულად ვერ ხერხდება ყველაფრის განხორციელება, თუმცა ეს უახლოეს საათებში გამოსწორდება

„ყველაფერს გააკეთებს სასწრაფო დახმარება, რომ მაქსიმალურად სწრაფად იყოს რეაგირება ყველა საჭიროებაზე“, - ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა მიხეილ სარჯველაძემ ოზურგეთში განაცხადა.

სარჯველაძის თქმით, შემუშავდა გეგმა, რომლის მიხედვითაც მოქალაქეების ყველა საჭიროება დაკმაყოფილდება.

„რთული მდგომარეობაა, საქმე გვაქვს სტიქიასთან, მაგრამ საბედნიეროდ, შემუშავდა გეგმა, რომლის მიხედვითაც მოქალაქეების ყველა საჭიროება იქნება დაკმაყოფილებული. ეს არ არის მარტივი ამოცანა, ამისთვის ყველა რესურსი მობილიზებულია, ყველა მიმართულებით. ამ მხრივ განსაკუთრებული მნიშვნელობა აქვს სასწრაფო სამედიცინო დახმარების გამართულ მუშაობას.

ყველაფერს გააკეთებს სასწრაფო დახმარება, რომ მაქსიმალურად სწრაფად იყოს რეაგირება ყველა საჭიროებაზე, რომლის თაობაზეც ინფორმაციას ვიღებთ. ყველა ამ მიმართულებით ამ დღეების განმავლობაში თავდაუზოგავად იმუშავა სასწრაფო სამედიცინო დახმარების ბრიგადებმა, დაწყებული მედიკამენტების საჭიროებიდან, უშუალოდ სამედიცინო მომსახურების გაწევით დასრულებული.

ბუნებრივი და გასაგებია, რომ დიდთოვლობის გამო ისე ოპერატიულად ვერ ხერხდება ამ ყველაფრის განხორციელება, თუმცა, ვფიქრობ, ეს პრობლემა უახლოესი საათების განმავლობაში გამოსწორებული იქნება. ყველგან იქნება ხელმისაწვდომი ყველა რესურსი, რაც სჭირდებათ მოქალაქეებს“, - განაცხადა სარჯველაძემ.